PARA SA ISANG BUTIKING NADIKIT SA FLY CATCHER ISANG BIYERNES

Nakita kita

kumakawag-kawag

itinutulak

ang buong katawan

para makaalpas

pero sa bawat piglas

ay lalo kang nababaon

sa 'yong parihabang kumunoy.

Nakita kita

naghahabol ng hininga

puno ng kaba

habang pumipiri-pirikot

ang 'yong katawan

at halos magkabakli-bakli

sa pagkakadikit

sa 'yong libingan.

Nakita kita

nang lisanin mo

ang mundong ibabaw

sa ilalim ng mesa

Iyon na ba ang huli mong sandali

o may pupuntahan ka pa?

Hindi ko alam

kung ipagdarasal ka:

ang butiki ba ay may kaluluwa?